Bakıda valideyinlər şagirdlər üçün iş dəftəri tapmaqda çətinlik çəkirlər. Bu barədə Milli.az -ın yaydığı xəbərdən məlum olub.
Məktəblərdə iş dəftərlərinin məcburi tələb olması valideyinlərin şikayətinə səbəb olur. Onların sözlərinə görə, dərs ili başdasa belə, hələ də uşaqları üçün iş dəftəri tapa bilmirlər. Bakıda satışı yalnız poçtlarda təşkil olunduğuna görə, valideyinlər bu dəftərləri başqa yerlərdən ala bilmirlər. Onlar bildirirlər ki, paytaxtın bir çox poçt məntəqələrində qıtlıq yaşanır.
Təhsil İnstitutunun direktoru Rüfət Əzizov bildirib ki, paytaxtda belə bir problemin yaşandığından xəbərdardırlar. Çatışmazlığın yaşandığı məntəqələrə gələn həftədən yeni nüsxələr gətiriləcək.
İş dəftərlərinin poçtlarda satılması "Azərpoçt" ilə Təhsil Texnologiyaları Mərkəzi arasında bağlanmış müqavilə əsasında təşkil olunur və bu proses tələbata uyğun olaraq, hər gün həyata keçirilir.
