Paytaxtın Nəsimi rayonu, Kövkəb Səfərəliyeva, 23 ünvanında aparılan tikinti işləri ərazidə yaşayan sakinləri narahat edir. Bu haqda bu gün, 3 iyul tarixində Bakuplus.az Oxu.az-a istinadən məlumat verir.
Sakinlər deyirlər ki, gecə saatlarında ağır texnikanın səs-küyündən dincəlmək mümkün olmur.
Daxili İşlər Nazirliyinin sözçüsü Lumu İsrəfilli bildirib ki, həmin tikinti ərazisində iritonnajlı texnikanın müəyyən saatlarda işləməsi təsdiq olunmuş normativlərə uyğun təşkil edilir.
DİN-in rəsmisi onu da qeyd edib ki, tikinti işləri yekunlaşmaq üzrədir.
Nazirlər Kabinetinin müvafiq qərarına uyğun olaraq, xüsusi təyinatlı, o cümlədən qəza-bərpa və xilasedici nəqliyyat vasitələri istisna olmaqla, icazə verilən maksimum kütləsi 5 tondan çox olan avtomobillərin hərəkəti Bakı şəhəri üzrə mövsümə əsasən müəyyən edilib.
Yük avtomobillərinin 1 may-1 oktyabr tarixləri aralığında səhər saat 7:30-dan axşam saat 21:00-a kimi, 1 oktyabr-1 may tarixləri aralığında isə səhər saat 7:30-dan axşam saat 20:00-a kimi paytaxta daxil olması qadağandır.
