Bu gün Azərbaycanda yeganə olan Bakı funikulyorunun 65 yaşı tamam olur.
Bakı Funikulyoru 5 may 1960-cı ildə istifadəyə verilib. O tanınmış dövlət xadimi, Əməkdar mühəndis Əliş Ləmbəranskinin təşəbbüsü ilə tikilib. SSRİ dövründə xüsusi sifarişlə Ukraynanın Xarkov şəhərində hazırlanaraq buraya gətirilib.
Funikulyorun 2 stansiyası var: “Bəhram Gur” və “Şəhidlər Xiyabanı”. Bu nəqliyyat vasitəsi saatda orta hesabla 2 min sərnişini daşımaq imkanına malikdir.
Bakı funikulyoru kompüter sistemi ilə idarə olunur. Texniki nasazlıq aşkarlandığı halda, dərhal mərkəzə məlumat ötürülür.
Müxtəlif vaxtlarda təmirə bağlanan funikulyor sonuncu dəfə 2012-ci il mayın 23-də əsaslı təmirdən sonra yenidən istifadəyə verilib.
