Bakıda sənədsiz torpaq satan dələduzlar saxlanılıb.
Lent.az xəbər verir ki, Xəzər rayon Binə qəsəbəsində müvafiq sənədləri olmayan torpaq sahələrinin satışı həyata keçirilib, eləcə də tikintiyə razılıq alacaqları vədi ilə insanların etibarından sui-istifadə edərək dələduzluq edilib.
Rayon Polis İdarəsinin əməkdaşları əməlləri törədən 46 yaşlı Zaman Babayev və 48 yaşlı Bərxudar Səmədovu saxlayıblar.
Bu şəxslər qabaqcadan əlbir olaraq sənədləri olmayan torpaqları müxtəlif şəxslərə sataraq ümumilikdə zərərçəkənlərə 154800 manat məbləğində maddi ziyan vurublar.
Faktla bağlı cinayət işi başlanılıb, Z.Babayev və B.Səmədov təqsirləndirilən şəxs qismində istintaqa cəlb olunub. Onların qanunsuz əməllərindən zərər çəkmiş digər şəxslər varsa, bu barədə polisə məlumat verə bilərlər.
