Paytaxtın Səbail rayonu, Cəfərov qardaşları və Lermontov küçələrinin kəsişməsində yerləşən, vətəndaşların Lermontov parkı kimi tanıdığı məkan baxımsız haldadır. Bu haqda bu gün, 24 iyun tarixində Bakuplus.az ATV-yə istinadən məlumat verir.
Uçmuş divarları, ot basmış həyəti olan ərazinin yaxınlığında yaşayan sakinlər giley-güzar edirlər. Mozaik fiqurlarla əhatə edilən məkan ötən əsrin 80-ci illərində salınıb. Zamanla dağılsa da, heç bir iş görülməyib və baxımsız yerə çevrilib.
Yerlilər deyirlər ki, ilin isti aylarında axşam təmiz hava almaq üçün evlərinin bir addımlığında olan bu yerə könlün xoşluğu ilə gələ bilmirlər.
Məsələ ilə bağlı Səbail Rayon İcra Hakimiyyətindən bildirildi ki, rayonun Lermontov və Cəfərov qardaşları küçələrin kəsişməsində yerləşən uşaq meydançasında abadlıq və yenidənqurma işlərinin planlaşdırılması ilə bağlı aidiyyəti qurum və təşkilat rəhbərlərinə müvafiq tapşırıqlar verilib. Layihə tamamlanmaq üzrədir. Yaxın vaxtlarda təmir işlərinin aparılması nəzərdə tutulub.
