Bir neçə ildir ki, Dənizkənarı Bulvarın ərazisində olan 40-a yaxın attraksion yığışdırılıb. Onların əvəzində xeyli sayda iaşə obyektləri açılıb. Bu haqda bu gün, 19 iyul tarixində Bakuplus.az Bizim.Media-ya istinadən məlumat verir.
Onların yerinə təzə attraksionların gətirliməsi ilə bağlı söhbətlər aparılsa da, uzun müddət ərzində sakinlər və şəhərin qonaqları bu fürsətdən yararlana bilmirlər. Bəs böyüklərin yeyib-içməsi ilə yanaşı, bulvarda nə vaxt uşaqlar üçün şərait yaradılacaq?
Dənizkənarı Bulvar İdarəsinin mətbuat katibi Əfsanə Mehdiyevanın sözlərinə görə, yığışdırılan attraksionlar müasir tələblərə cavab vermədiyinə görə istismara qaytarılmayıb.
“Köhnəlmiş attraksionların yığışdırılması həm də təhlükəsizlik baxımından vacib idi. Onların yeni nəsil attraksionlarla əvəzlənməsi istiqamətində işlər aparılır. İlin əvvəlində azyaşlılar üçün bir neçə yeni attraksion, gəzinti qatarları istifadəyə verilib. Bundan əlavə, mart ayında Panorama attraksionu əsaslı təmir olunduqdan sonra yenidən istifadəyə verilib. Qeyd edək ki, attraksion yalnız küləkli hava şəraitində işləmir”, – deyə qurum sözçüsü bildirib.
