“Sosial ipoteka məsələsində ən çox gözlənilən yenilik bankların faizləri aşağı salmasıdır. Bu, birbaşa banklarla bağlı məsələdir. Gərək onlar da tərəfdaş olaraq bu məsələdə maraqlı olsunlar”.
Bunu gənclər və idman nazirinin müavini Fərhad Hacıyev “Ailə - dəyişməyən dəyərimiz” mövzusunda keçirilən Gənc Ailə Forumunda çıxışı zamanı deyib.
O bildirib ki, ailələr üçün güzəştli kredit şərtlərinin daha yumşaq olmasına çalışmalıyıq.
Bəs görəsən, Sosial ipoteka kreditlərinin faizləri azaldılacaq?
Mövzu ilə bağlı Bakuplus.az-a açıqlama verən bank məsələləri üzrə ekspert Əkrəm Həsənov qeyd edib ki, sosial ipoteka kreditlərinin faiz dərəcəsi aşağı endirilməyəcək:
“Sosial ipoteka kreditləri 4 faiz ilə verilir. Bu, kifayət qədər aşağı faizdir. Mərkəzi Bankın uçot faizi 7,25-dir. Demək olar ki, bu, iki dəfə çoxdur. Sosial ipoteka kreditlərindəki 4 faiz elə Mərkəzi Bankın rəsmi inflyasiya dərəcəsidir. 4 faizlə kredit götürmək, faizsiz kredit götürməklə eynilik təşkil edir.
10-15 ildən çoxdur ki, sosial ipoteka kreditləri 4 faizlə verilir. Bəlkə də aşağı salına bilər. Lakin inanmıram ki, faizi dəyişəcəklər. Şərtləri, verilmə müddəti və məbləği vacibdir. Bunların sırasında ən önəmlisi kreditin davamlılığıdır. Çünki müddət aylıq ödənişə təsir edir”.
Ə.Həsənov qeyd edib ki, kredit rəsmi gəliri olan şəxslərə veriləcək:
“Nə qədər güzəşt olursa olsun, kredit rəsmi gəliri olan şəxslərə veriləcək. Azərbaycan xalqının əksəriyyəti heç faizsiz krediti də qaytarmaq iqtidarında deyil. O qədər gəliri yoxdur ki, həm ailəsini saxlasın, həm də krediti versin.
Kimin pulu çoxdursa, o ev ala biləcək. Bir nəfərin onlarla, yüzlərlə evi var. Bu reallıqdır. Kapitalist ölkələrdə çox adamın evi yoxdur. Kirayədə yaşayırlar. İpoteka kreditinin şərtləri yumşaldılsa belə, bilmək olmazı ki, hamı ev alacaq ya, yox. Kimin maaşı çoxdursa, evi də o ala biləcək”.
