Paytaxtın Hövsan qəsəbəsi, “Bahar” yaşayış massivində yaşayan sakinlər axşam saatlarında ərazini bürüyən üfunətdən şikayətçidirlər. Bu haqda bu gün, 3 avqust tarixində Bakuplus.az Xəzər Xəbər-ə istinadən məlumat verir.
Vətəndaşların sözlərinə görə, pis qoxu yaxınlıqdakı zavoddan yayılır. Bu qoxudan insanlar axşamlar evdən çıxa bilmirlər.
Məsələ ilə bağlı Bakı Sukanal İdarəsindən bildirilib ki, iyin neft boruları, Hövsan aerasiya stansiyası və ya idarəyə məxsus kanalizasiya xətləri ilə heç bir əlaqəsi yoxdur.
“Hövsan kəndində mərkəzləşmiş kanalizasiya şəbəkəsi olmadığı üçün vətəndaşlar xüsusi quyular qazmaqla fekal suların kənarlaşdırılmasını həyata keçiririlər. Bu quyular dolduqdan sonra onları xüsusi maşınlar vasitəsilə daşıyaraq həmin kanala axıdırlar. Bu da atmosferə xüsusi qoxunun yayılmasına səbəb olur. Hal-hazırda yay mövsümü olduğu üçün hidrogen sulfit qazının miqdarının artması ilə qoxuların atmosferə atılması daha da çoxalır”, – deyə Bakı Sukanal İdarəsinin rəis müavini Əlizadə Nəsirov bildirib.
Açıqlamaya əsasən, qoxunun mənbəyi illərdir həll edilməyən Hövsan açıq kanalıdır. Məsələnin nə vaxt həll ediləcəyinə gəldikdə isə bir müddət əvvəl aidiyyəti qurumun rəsmisi bildirib ki, Abşeron yarımadasının baş planı olacaq. Həmin plana əsasən, bu açıq kanala tökülən tullantıların da qarşısı alınıb kanalizasiya kollektorlarına yönləndiriləcək. Bunun üçün də hökmən bu ərazilərdə kanalizasiya infrastrukturu yaradılacaq.
