Bildiyimiz kimi, noyabrın 30-dan “Həzi Aslanov” stansiyasının dalanında əsaslı təmir və yenidənqurma işlərinə başlanılıb və buna görə də qatarlar “Əhmədli” stansiyasına qədər hərəkət edir.
Təbii ki, stansiyada başlayan işlərə görə bu ərazidə yaşayan sakinlər digər metrostansiyalara getmək üçün marşrutlardan istifadə edirlər.
Məsələylə bağlı sual yaranır. Niyə bu təmir yay aylarında, daha doğrusu şagird və tələbələrin tətil günlərində aparılmadı, məhz noyabr ayına saxlanıldı?
"Bakı Metropoliteni" QSC-nin mətbuat katibi Bəxtiyar Məmmədov Bizim.media-ya açıqlamasında bildirib ki, stansiyada başlayan təmir qısamüddətli deyil, ən azı 1 il yarım, 2 il davam edəcək:
“Sərnişin təhlükəsizliyi üçün sadəcə qatarlar deyil, stansiyalar da önəmlidir. Ondan sonra isə stansiyanın özündə təmir işləri başlayacaq. Bu, məcburiyyətdən yaranıb. Stansiya 2002-ci ildə istifadəyə verilib. Ancaq inşasına 1981-ci ildə başlanıb. SSRİ-nin dağılmasıyla açıq hava şəraitində qalan konstruksiyalar, beton sahələrin artıq mənfi təsirləri var, üstəlik həmin ərazi Bakının ağır hidrogeoloji ərazilərindən birində yerləşir. Stansiyanın vəziyyətini əyani şəkildə müşahidə etmək olar.
Sərnişinin tam təhlükəsizliyi üçün təkcə qatar deyil, stansiya da təhlükəsiz olmalıdır. Bu məsələlərə görə stansiyanın təmiri məcbur idi. İnterval yalnız “Əhmədli-Həzi Aslanov” stansiyaları arasında 10 dəqiqə təyin olunub. Amma “Əhmədli-Dərnəgül”, “Əhmədli-İçərişəhər” istiqamətində isə öncədən olduğu kimidir”, - deyə Bəxtiyar Məmmədov qeyd edib.
