Bakının Qaradağ rayonu, Lökbatan qəsəbəsində istismar müddəti bitmiş evlərdə hələ də yaşayanlar var. Bu haqda bu gün, 4 mart tarixində Bakuplus.az İctimai TV-yə istinadən xəbər verir.
Sözügedən ikimərtəbəli binalar 1934-cü ildə inşa edilib. Sakinlərin sözlərinə görə, 90 yaşlı bina artıq yaşayış üçün yararsız vəziyyətdədir.
“Burada kanalizasiyalar da xarabdır. Bir müddət bundan qabaq kanalizasiya borusu qırılaraq qonşunun evinə tökülüb. Yaşlılar güclə burada yeriyirlər. Ərazi plana düşüb, ancaq bir iş görən yoxdur”, – deyə sakinlər şikayət edirlər.
Onlar əlavə ediblər ki, 2 il bundan əvvəl aidiyyəti qurumlar mənzillərlə bağlı sənədlər toplayıb və binanın söküləcəyini bildiriblər. Ancaq bu günə qədər heç kim gəlməyib.
150 saylı Mənzil Kommunal İstismar Sahəsinin (MKİS) rəisi Misir Mahmudov bildirib ki, sakinlərin köçürülmələri ilə bağlı sənədlərin toplanılması düzgün deyil.
“Biz öyrənmək istəyirik ki, hansı evin çıxarışı var, hansı evdə order əsasında yaşayırlar, hansı ev sərəncam əsasında sakinlərə verilib”, – deyə Misir Mahmudov qeyd edib.
Əlavə olunub ki, binaların istismar müddətini başa vurması və ya yararsız halda olması ilə bağlı FHN-ə müraciət edilib. Yekun qərar tikililərə baxış keçirildikdən sonra veriləcək.
