Azərbaycanda avtomobillərin itən nömrələrini niyə yeniləmək olmur? Bu haqda bu gün, 13 aprel tarixində Bakuplus.az ATV-yə istinadən xəbər verir.
Belə ki, qanuna əsasən, nəqliyyat vasitələrinin dövlət qeydiyyat nişanları itdikdə və ya oğurlandıqda eyni nömrəni yeniləmək mümkün deyil. Yeganə yol yeni nömrə almaqdır.
Buna səbəb həmin nömrələrin cinayət əməllərində istifadə olunma riskidir. Buna görə də nömrələr dövriyyədən çıxarılır.
“Nömrələr tapıldıqda ilk olaraq sahibinə təklif edilir. Əgər imtina olunarsa, nömrə satışa çıxarılır”, – deyə Dövlət Yol Polisindən bildirilir.
Ekspertlər isə bu qanunun artıq köhnəlmiş olduğunu vurğulayırlar.
“Artıq nəzarət sistemləri daha da təkmilləşdirilib. Buna görə də itmiş nömrələrdən istifadə edənlər tez bir zamanda ifşa oluna bilərlər”, – deyə ekspertlər qeyd edirlər.
