Bakıda müştərilərdən biri Xırdalandakı “Vip” şirniyyat evində xoşagəlməz hal ilə qarşılaşıb.
Bakuplus.az xəbər verir ki, bu barədə müştəri sosial şəbəkələrdə paylaşım edib.
Onun sözlərinə görə, tortun dizaynı bərbad və üzərindəki yazı səhv yazılıb.
“Ayın 10-u tort sifariş vermişəm. 12-si saat 17:00-da götürməli idim. Ayın 11-i yazdım ki, üzərinin yazısını dəyişmək istəyirəm. Ancaq bunun mümkün olmadığını dedilər. Ayın 12-si tortu götürməyə getdim. Üzərini mənim sifariş vermədiyim formada bəzəmişdilər. Hətta üzərinin yazısını orada satıcı işləyən qadın əlavə etdi. O da səhv yazdı. Üzərinə “Happy Birthday Sevda” yazılıb. Ancaq mən Aytac demişdim. Aytac hara, Sevda hara. Bunları necə qarışdırmaq olar. Başa düşmürəm ki, bu necə biabırçılıqdır”, - deyə alıcı bildirib.
Şikayətçi həmçinin şirniyyat evinin işçilərinin kobud rəftarından da narazılığını bildirib:
“Tort bir yana, işçilər müştəri ilə çox kobud rəftar edirlər. Orada işləyənlərin üslub problemi var. İşçinin “whatsapp”da danışıq tərzi məni şoka saldı. Müdiriyyət qayıdıb deyir ki, nə olub torta?”.
Müştəri bildirib ki, həmçinin ona satış qəbzi də verilməyib.
Məsələni aydınlaşdırmaq üçün sözügedən şirniyyat evi ilə əlaqə saxladıq. Oradan bizə bildirildi ki, hadisədən xəbərdardırlar:
“Bəli, belə bir hadisə olub. Müştəri bizimlə kobud danışıb deyə biz də elə danışmışıq. Ola bilər üzərindəki ad səhv yazılsın. Amma buna görə işçilərlə kobud və artıq-əskik danışmağa müştərinin ixtiyarı var? Mən alıcının özünə də üzrxahlıq etdim ki, belə səhv olub. Müştəri isə “whatsapp”a baxan işçimizə artıq-əskik sözlər deyib. Bizə “tupoy” deyir. Yazıda səhv olubsa, o “tupoy”luqdur? Həmin adamın əl qabiliyyəti var ki, burada işləyir. Öz halal zəhməti ilə pulunu qazanır. Kimsə kimisə alçaldıb təhqir edə bilməz. Mən müştərinin özünə də dedim. Əvvəlcə həmin adam özünə hörmət qoymalıdır ki, qarşıdakı da ona hörmət etsin”.
