Bakının Nəsimi rayonu, Alı Mustafayev küçəsində yaşayan sakinlər ünvandakı vəziyyətdən narazıdırlar. Bu haqda bu gün, 28 may tarixində Bakuplus.az ATV-yə istinadən xəbər verir.
Sözügedən ərazidə yerləşən 37 saylı binanın sakinləri məhəllənin baxımsızlığından şikayət edirlər. Onların sözlərinə görə, ərazidə antisanitariya vəziyyəti yaranıb, burada yerləşən tərk edilmiş tikili isə narkomanların yuvasına çevrilib. Bu da küçədə oynamaq istəyən uşaqlar üçün təhlükə yaradır.
“Narkomanlar, tüfeyli həyat tərzi sürənlərin hamısı bu binanın içində yatırlar. Blokların qapısı yox, pəncərələri yox. Həyətdə uşaqlar oynamaqdan qorxurlar. Həmçinin piyadalar üçün əsas yolların birində qəzalı vəziyyətdə olan hasar da var, hansı ki hər an kiminsə üzərinə aşa bilər”, – deyə sakinlər şikayət edirlər.
Nəsimi rayonu 33 saylı Mənzil Kommunal İstismarı Sahəsinin müdiri Mirnazir Əliyev məsələ ilə bağlı bildirib ki, hazırda yaxınlıqda olan digər binada və həyətdə təmir işləri gedir. Növbə sözügedən binaya da gəlib çatacaq.
