Sabunçu rayon sakininin evinə onun xəbəri olmadan naməlum şəxslər qeydiyyata düşüblər. Bu haqda 13 oktyabr tarixində Bakuplus.az RealTV-yə istinadən xəbər verir.
Süleyman Əliyev Sabunçu qəsəbəsi, Aydınbəyov küçəsi, 34 ünvanında yerləşən evdə dünyaya göz açıb. Hazırda yaşlı anası və övladları ilə birlikdə burada yaşamağa davam edir. Onun sözlərinə görə, yaxınlıqda evi, həmçinin bir neçə iaşə obyekti olan Əli Həsənov adlı şəxs qızı və nəvəsi ilə birlikdə Süleyman Əliyevin xəbəri, eləcə də razılığı olmadan sözügedən evə qeydiyyata düşüb. Bu barədə 2012-ci ildə xəbər tutan Süleyman Əliyev elə həmin gündən problem yaşayır. Çünki qarşı tərəf qeydiyyatdan çıxmaqdan imtina edir.
Süleyman Əliyevin iddialarına görə, o, qarşı tərəfdən evə olan qanuni sənəd tələb etsə də, onlar bu sənədi göstərməkdən imtina ediblər. Hətta ona dəfələrlə hədə-qorxu gəliblər. Vətəndaş lazimi instansiyalara şikayət etsə də, bu, nəticə verməyib. Daha sonra sözügedən çıxarışa baxmaq məqsədilə Sabunçu qəsəbəsi inzibati ərazi dairəsi üzrə nümayəndəliyə müraciət edib.
“Yəni bizdə çıxarışımız, hər şey öz qaydasındadır. Biz bunların çıxarışlarını tələb edirik, onlar bizə vermirlər. Biz bununla əlaqədar kənd sovetinə də müraciət etdik. Orada bizə dedilər ki, bunların çıxarışı var. Mən baxdım özüm, bunlar mənə kseroksa oxşayan bir qeydiyyat çıxarışı göstərdilər”, - deyə Süleyman Əliyev bildirib.
Araşdırmalar nəticəsində məlum olub ki, ev sahibinin razılığı olmadan başqa şəxslərin qeydiyyata düşməsi qanuni cəhətdən heç bir halda mümkün deyil və məsələni yalnız məhkəmə yolu ilə çözmək olar.
