Nizami rayonu, Elşən Süleymanov küçəsində irigövdəli şam ağacları quruyur. Sakinlər iddia edirlər ki, buna səbəb baxımsızlıqdır. Bu haqda bu gün, 26 iyun tarixində Bakuplus.az ATV-yə istinadən məlumat verir.
Bu ünvanda artıq təmxinən 10-a yaxın irigövdəli şam ağacı quruyub. Eyni zamanda ağacların budaqları kəsilərək, boş əraziyə atılıb.
Sakinlər deyirlər ki, hasara alınan ərazidə ağaclar baxımsızlıqdan quruyur. Problemlə bağlı tədbir görən də yoxdur.
Bina nəzarətçisi isə vəziyyətin yaranmasında sakinləri günahlandırır. Onun sözlərinə görə, ərazi yaşayış binalarına aiddir, antisanitar vəziyyəti yaradan da sakinlərdir.
Nizami rayonu Mənzil-Kommunal Təsərrüfatı Birliyindən bildirildi ki, ərazi qapalı olduğundan təmizliyə görə binanın nəzarətçiləri məsuliyyət daşıyırlar. Ancaq buna baxmayaraq, həftəsonları keçirilən iməcilik zamanı rayonun bir hissəsi kimi orada da təmizlik aparılır. Proses davamlı olacaq.
Ağaclara gəldikdə, Bakı şəhər yaşıllaşdırma təsərrüfatından bildirildi ki, bəzi şam ağacları xəstəliklə əlaqədar quruyur.
