Nizami rayonu, Qara Qarayev prospekti, 74D ünvanında iaşə obyektində nöqsanlar aşkarlanıb. Bu haqda bu gün, 14 iyun tarixində Bakuplus.az Qida Təhlükəsizliyi Agentliyinə istinadən xəbər verir.
“Dönər Peraşki N1” ictimai iaşə müəssisəsində monitorinq keçirilib. Araşdırma zamanı müəssisənin qida təhlükəsizliyi qeydiyyatından keçirilmədən fəaliyyət göstərdiyi, istifadə olunan avadanlıqların tamlığının pozulduğu, işçilərin əllərinin, məhsulların və avadanlıqların yuyulması üçün ayrıca yuma çanağının təşkil edilmədiyi, havalandırma sisteminin quraşdırılmadığı, işçilərin tibbi müayinədən keçirilmədiyi və xüsusi geyimlə təmin olunmadığı, mütəmadi təmizlik işlərinin aparılmadığı və digər nöqsanlar aşkarlanıb.
Eyni zamanda ümumi çəkisi 6 kq marinə edilmiş, soyudulmuş bütöv toyuq məhsullarına dair etiket məlumatlarının, məhsulların keyfiyyət və təhlükəsizliyini təsdiq edən sənədlərinin olmadığı müəyyən olunub.
Faktla bağlı müəssisədə toyuq əti dönərinin satışı dayandırılıb, rəhbərlik məsuliyyətə cəlb olunub.
