Nizami rayonu, Rüstəm Rüstəmov küçəsi, 19 ünvanında yerləşən dönərxanada nöqsanlar aşkarlanıb. Bu haqda bu gün, 4 iyun tarixində Bakuplus.az Qida Təhlükəsizliyi Agentliyinə istinadən xəbər verir.
“Dönər House 24” ictimai iaşə müəssisəsində aparılan monitorinq zamanı qida təhlükəsizliyi sahəsində qüvvədə olan normativ hüquqi aktların, sanitariya norma və qaydalarının tələblərinin pozulduğu məlum olub.
Belə ki, bəzi qida məhsullarının üzərində etiket məlumatlarının olmadığı, temperatur rejiminə əməl edilmədiyi, emal prosesində istifadə edilən qida məhsullarının yuyulması üçün yuma çanağının təşkil olunmadığı, istifadə olunan avadanlıqların tamlığının pozulduğu və digər nöqsanlar olduğu məlum olub.
Bişmiş toyuq dönərindən götürülmüş nümunələrin Qida Təhlükəsizliyi İnstitutunun müvafiq laboratoriyasında müayinəsi nəticəsində nümunələrdə insan sağlamlığı üçün təhlükəli hesab olunan E.Coli bakteriyası aşkarlanıb.
Qeyd olunan faktlarla bağlı müəssisənin fəaliyyəti məhdudlaşdırılıb.
