Fövqəladə Hallar Nazirliyinin (FHN) xidməti otağında intim videolar çəkən polkovnik Zaur Mirzəyevin növbəti cinayət əməlinin üstü açılıb. Bu haqda bu gün, 22 dekabr tarixində Qafqazinfo məlumat verir.
O, Xidmətin rəisi Füzuli Əsədovla əlaqələrindən istifadə edərək Biləsuvar şəhər sakini Murad Qəfərzadəyə onu Dövlət Yanğından Mühafizə Xidmətinin rayon şöbəsinə işə düzəldəcəyini vəd edib. O, həmkarı A.Nəsirova vasitəsilə 2019-cu ilin ortalarında Muradın atası Şahəddin Qəfərovdan 10.000 manat alıb. Pulu aldıqdan sonra Dövlət Yanğından Mühafizə Xidmətinin rəisinə işə qəbulla bağlı sənədləri təqdim edib. Bundan sonra Qəfərzadə yanğınsöndürən kimi işə götürülüb.
Murad Qəfərzadənin atası Şahəddin Qəfərov dindirilmə zamanı etiraf edib ki, o, pulu Zaur Mirzəyevə verib. Mirzəyev isə bu ittihamları qəbul etmir.
Bu əmələ görə FHN-in polkovnikinin ittiham olunduğu maddələrə Cinayət Məcəlləsinin “Vəzifəli şəxsin qərarına qanunsuz təsir göstərmə - nüfuz alveri” maddəsi əlavə edilib. Onun işinə Bakı Ağır Cinayətlər Məhkəməsində baxılır.
Daha öncə məlum olub ki, Zaur Mirzəyev FHN-in Dövlət Yanğından Mühafizə Xidmətinin rəisi Füzuli Əsədovun əmisi qızı ilə evlidir. Füzuli Əsədov isə öz növbəsində keçmiş kənd təsərrüfatı naziri Heydər Əsədovun qardaşıdır.
