25 sentyabr tarixində Baş Prokurorluğun, Respublika Hərbi, Bakı şəhər və paytaxtın tabe rayon prokurorluqlarının əməkdaşları ağacəkmə aksiyası keçirib. Bu haqda Azərbaycan Respublikasının Baş Prokurorluğu məlumat yayıb.
Aksiya Azərbaycan Prokurorluğunun yaranmasının 103 illiyi münasibətilə Binəqədi rayonu Xocasən qəsəbəsinin Sulutəpə yaşayış massivində təşkil edilib.
Aksiyanın əsas məqsədi ağac əkininin təşviqinə, Abşeron yarımadasının ekoloji mühitinin yaxşılaşdırılmasına, paytaxtda yaşıllıq sahələrinin salınması və onların mühafizəsinə diqqət cəlb etməkdir.
Ekologiya və Təbii Sərvətlər Nazirliyi də bu prokurorluq əməkdaşları ilə birgə iştirak edib.
Tədbirdə 1 200-dən artıq şam və zeytun ağacları əkilib. Budan əlavə, həmin ərazidə ötən illərdə əkilən ağaclara qulluq göstərilib və təmizlik-abadlıq işləri aparılıb.
Əkilən ağacların inkişafı üçün münbit torpaq və mineral gübrələrdən istifadə olunub, həmçinin onların küləkdən qorunması və mühafizəsi məqsədilə zəruri tədbirlər görülüb.
