Pirşağı qəsəbəsi, Hüseynbala Əliyev küçəsində yaşayan sakinlər yol infrastrukturundan narazıdırlar. Bu haqda 13 may tarixində Bakuplus.az Realtv-yə istinadən xəbər verir.
Sakinlər asfaltsız məhəllədaxili yollardan istifadə edərkən çətinlik çəkirlər. Onlar bu yol ilə məktəbə, işə, bazara gedib gəlirlər. Bundan əlavə, məhəllədə yerləşən kanalizasiya xəttinin üstü 5 ildir ki açıq qalıb. Nəticədə ərazini pis qoxu bürüyüb.
Sakinlər deyir ki, bir il bundan öncə məhəllənin yolları o qədər də pis vəziyyətdə olmayıb. Məhəllə asfaltlanmasa da, qonşular öz büdcələri hesabına yolu istifadəyə yararlı vəziyyətə gətiriblər. Amma sonradan aparılan qazıntı işləri torpağın altındakı gili üzə çıxarıb, nəticədə bu, yolu keçilməz edib.
“Qazla əlaqədar qazıblar, yeri pis günə qoyublar. Yola heç olmasa daş töksünlər ki, insanların ayağı palçığa batmasın. Həmçinin kanalizasiya, yayda iydən və ağcaqanad əlindən dayanmaq olmur. Nə qədər traktora pul verib kanalizasiya təmizlətdirək?”, - deyə sakinlərdən biri şikayətini bildirib.
“Yaxın gələcəkdə Pirşağı xarici görünüşünü xeyli dəyişəcək. Belə ki, ərazidə, nəzərdə tutulan proqrama əsasən, abadlıq və yenidənqurma işləri bitdikdən sonra mövcud kanalizasiya sistemləri də yeniləri ilə əvəzlənəcək, məhəllədaxili yollara asfalt döşənəcək, yaşıllaşdırma işləri həyata keçiriləcək. Gələcəkdə abad məhlələrin də təmizliyinin, bərpasının qorunması istiqamətində yeni layihələr reallaşacaq”, - Bakı Abadlıq Xidməti açıqlama verib.
