Bakının Suraxanı rayonu, Zığ qəsəbəsində yaşayan sakinlərin yolu təhlükəsiz keçmək üçün normal keçidləri yoxdur. Nişan olan cəmi bir yer var ki, həmin yerdə də zolaqlar silindiyindən yolda təhlükəli vəziyyət yaranır. Bu haqda bu gün, 26 iyun tarixində Bakuplus.az ATV-yə istinadən məlumat verir.
Zığ sakinlərinin istəyi ondan ibarətdir ki, qəsəbəyə bir neçə yerdə işıqfor qoyulsun və piyada keçidləri təşkil olunsun.
Yerli sakinlər deyirlər ki, avtomobillərin sürətlə hərəkət etdiyi yolda tez-tez qəzalar baş verir. Qəsəbədə böyük yaşayış kompleksi də var. Buradan çıxan insanlar avtobus dayanacağına sağ-salamat çatanda sevinirlər. Çünki bu yollardan keçərkən hər an ölümlə üz-üzə qalırlar.
Sakinləri narahat edən məsələ ilə bağlı AYNA-ya müraciət etdik. Bildirildi ki, yol nişanlanma xətlərinin silinməsı yoldakı hərəkətin intensivliyi və meteoroloji amillərin təsiri ilə əlaqədardır. Silinən nişanlanma xətlərinin yenilənməsi isə plan üzrə mərhələli qaydada həyata keçirilir. Əlavə edildi ki, sözügedən ərazidə 8 piyada keçidi və müvafiq yol nişanları mövcuddur. Yaxın vaxtlarda piyada zolaqlarının yenilənməsi işləri aparılacaq.
