Bakıda pomidorların qiyməti kəskin artıb. Bu haqda bu gün, 4 oktyabr tarixində Bakuplus.az ATV-yə istinadən xəbər verir.
Paytaxtın bəzi yerlərində pomidorun qiymətinin ətdən belə baha olduğu bildirilir. Belə ki, Özbək növü pomidorlar 7-8, Qazax növü 8-10, Xaçmaz pomidoru isə 5-7 AZN arası dəyişir. Satıcılar pomidorları fermerlərdən baha aldıqlarını bildirirlər, ancaq sonuncular bununla razı deyillər.
“Biz o qiymətə satmırıq. Bu gün hardasa 16-17 kq çəkisi olan yeşik 23-24 AZN-ə satılır”, – deyə fermerlərdən biri vurğulayıb.
Ekspertlərin sözlərinə görə, ölkədə pomidor qıtlığı yaşanır. Bu səbəbdən də qiymətlər kəskin artır.
“Bu, bilavasitə həm mövsümi faktorlarla əlaqədardır, eyni zamanda sahibkarlar xarici bazara üz tutduqlarından yerli bazarlarda daxili təlabatın ödənilməsi ilə bağlı müəyyən problemlər yaşanır”, – deyə onlar əlavə edirlər.
Həmçinin yaxın zamanda ucuzlaşmanın gözlənilmədiyi də qeyd olunub.
