Bakıda qəbirlərin üzərinə QR-kodlar quraşdırılır. Bu haqda bu gün, 12 aprel tarixində Bakuplus.az ARB-yə istinadən xəbər verir.
Belə ki, bir sıra paytaxt qəbiristanlıqlarında məzarların üzərinə xüsusi QR-kod qoyulub. Həmin kod vasitəsilə dünyasını dəyişən şəxs barəsində ətraflı məlumat almaq mümkündür.
Layihənin 2 nəfər tərəfindən yaradıldığı məlum olub. Onların sözlərinə görə, xidmətə tələb yüksəkdir və hətta xaricdən belə sifarişlər gəlir.
“Mərdəkanın Şəhidlər xiyabanı, Şəhidlər parkında xidmətlərimiz həyata keçirilib”, – deyə ideya müəllifi Zaur Quliyev qeyd edib.
İlahiyyatçı Fazil Əhməd məsələ ilə bağlı bildirib ki, islamda bu kimi xidmətlərdən istifadə etməyə qadağa yoxdur. Ancaq ilahiyyatçı sıravi vətəndaşların məlumatlarının açıq mənbədə olmasını düzgün hesab etmir.
“Şəhidlər, ictimai və tanınmış şəxslər üçün bu xidmət yaxşıdır. Ancaq digər şəxslər barəsində bunun olması, düşünürəm ki, həm faydasız, həm də insanların vaxtını almış olar”, – deyə ilahiyyatçı bildirib.
