Cari ay Lökbatanda yerləşən 4 saylı doğum evindəki rüşvət qalmaqalında iştirak edən həkim işdən çıxarılıb. Bu haqda bu gün, 29 iyun tarixində Bakuplus.az Qafqazinfo-ya istinadən məlumat verir.
Belə ki, tibb müəssisəsinin əməkdaşı yeni doğulmuş körpənin atasından “şirinlik” istəyib. Bunu əks etdirən videogörüntülər sosial şəbəkələrdə geniş yayılıb. Görüntüdəki şəxs “şirinlik” məbləği az olduğu üçün ataya etirazını bildirirdi.
TƏBİB-dən verilən məlumata görə, hadisə ilə bağlı araşdırma aparılıb. Nəticədə 4 nömrəli Doğum evinin Doğum şöbəsinin həkim-mama-ginekoloqu Məmmədova Sevinc Malik qızının əmək müqaviləsinə 27.06.2024 tarixində xitam verilib.
TƏBİB-nin icraçı direktoru Vüqar Qurbanovun sədrliyi ilə tabeli tibb müəssisələrinin rəhbər şəxslərinin iştirakı ilə keçirilən geniş tərkibli müşavirədə sözügedən müəssisə rəhbərinə neqativ hallarla mübarizə ilə bağlı ciddi tapşırıqlar verilib.
