Bir müddət əvvəl Xətai rayonu “Həzi Aslanov” metro stansiyası yaxınlığında yeni işıqforlar quraşdırıldı, çünki ərazidə mütəmadi olaraq, avtomobil qəzaları və piyada vurulması ilə nəticələnən hadisələr baş verirdi. Lakin aradan xeyli vaxt keçməsinə baxmayaraq, bu işıqforlar hələ də istifadəyə verilməyib. Bu səbəbdən ərazidəki təhlükəli vəziyyət hələ də davam edir. Bu haqda bu gün, 22 avqust tarixində Bakuplus.az ATV-yə istinadən məlumat verir.
“Həzi Aslanov” metro stansiyası yaxınlığında yerləşən bu yoldan gün ərzində xeyli sayda sürücü və piyada istifadə edir. Xudu Məmmədov və İlqar Zülfüqarov küçələrinin kəsişməsindəki ərazidə illərdir ki, avtomobil qəzaları və piyada ölümü ilə nəticələnən faciələr yaşanır. Yolun sağ və sol tərəfində iki aydan çoxdur ki, quraşdırılan işıqforlar işə salınmayıb.
Mövcud vəziyyət həm sürücülər, həm də piyadalar üçün təhlükəlidir.
Yerüstü Nəqliyyat Agentliyinin (AYNA) mətbuat katibi Tural Orucov bildirdi ki, həmin ərazidə işıqfor obyektlərinin kommunikasiya xətlərinin çəkilməsi ilə bağlı iş aparılır. Bu işlər yekunlaşdıqdan sonra yol nişanları quraşdırılaraq və nişanlama xətləri çəkilərək işıqforlar istifadəyə veriləcək.
