Sabunçu rayon Ramana qəsəbəsində sakinlər ərazidə yerləşən su kanalının baxımsız vəziyyətdə olmasından şikayətçidirlər. Bu barədə 26 avqust tarixində məlum olub.
Onların sözlərinə görə, kanalın zibil ilə dolub-daşması, həmçinin çirkab suların buraya axıdılması pis qoxuya səbəb olur. Günün qızmar vaxtı üfünət iyi qəsəbəni bürüyür.
Burada yaşayanlar bildirirlər ki, yaxınlıqda yerləşən Şuşa qəsəbəsinin kanalizasiya suları nasoslarla Ramanadakı su kanalına vurulur. Qəsəbədə kanalizasiya xəttinin olmaması sakinləri məcbur edir ki, çirkab sularını həyətlərində qazdıqları quyulara axıtsınlar.
Problemlə bağlı Sabunçu İcra Hakimiyyəti bildirib ki, həmən kanal mütəmadi təmizlənsə də, burada yaşayan sakinlər məişət tullantılarını bu kanala atırlar.
