Sabunçu rayonu, Kənd Ramanadakı Əmrulla Əliyev küçəsində yerləşən 25 ailənin yaşadığı binadakı mənzillərdən birinin tavanı uçub, xəsarət alanlar var. Bu haqda bu gün, 14 noyabr tarixində Bakuplus.az Xəzər Xəbər-ə istinadən məlumat verir.
Hazırda evlərindən ayrılan sakinlər harada qalacaqlarını bilmirlər. Onlar iddia edirlər ki, bu cür hallar ərazidə dəfələrlə baş verib.
Binada əvvəllər poliklinika fəaliyyət göstərib, sonradan isə köçkünlər məskunlaşıblar. Hazırda burada yaşayan sakinlər də bu mənzilləri məcburi köçkünlərdən alıblar. Onlar ərazidə belə halların 10 ildən artıq müddətdir baş verdiyini iddia edirlər.
Qəzalı vəziyyətdə olan mənzillərin yerləşməsi ilə bağlı aidiyyəti qurumlara müraciət edilsə də, heç bir nəticə olmayıb. Qonşuluqda yaşayan sakinlər də FHN-dən onlara mənzildə qalmamaq barədə göstəriş verildiyini iddia ediblər.
FHN-dən verilən məlumata görə, hadisə ilə bağlı rəy verilərək Balans saxlayıcı quruma təqdim edilib. Tədbir görmək isə onların səlahiyyətindədir.
Sabunçu rayon İcra Hakimiyyətindən (RİH) bildirilib ki, ərazi SOCAR-ın balansındadır. Bu barədə SOCAR-a RİH-dən məlumat verilib.
