Rayon xəstəxanalarına müraciət edənlərin böyük hissəsi ya həkimlər tərəfindən Bakıya yönləndirilir, ya da vətəndaşlar öz istəkləri ilə paytaxta yollanırlar. Bölgələrdə yaşayanlar deyirlər ki, əsas səbəb tibbi avadanlıqların və xidmətin qənaətbəxş olmamasıdır. Bu haqda bu gün, 18 dekabr tarixində Bakuplus.az ATV-yə istinadən məlumat verir.
Həkimlər də bölgələrdəki xəstəxanaların kifayət qədər müasir avadanlıqlarla təchiz olunmadığnı deyirlər.
“Rayonda yaşayan insanlarımızı narahat edən əsas məsələlərdən biri də rayonlarda ixtisaslı həkimlərin və müasir avadanlıqlarla təchiz olunmuş klinikaların az olmasıdır. Bu səbəbdən də insanlarımız paytaxt Bakıya və digər bölgələrə üz tuturlar”, – deyə həkim Elçin Hüseynov bildirib.
“Bəzən vətəndaşlar daha yüksək ixtisaslaşmış müəssisə üçün qonşu rayondakı müəssisələrdənsə Bakıya müraciət etməyi üstün tuturlar. Avadanlıqla mütəxəssis çatışmazlığına gəldikdə nəzərinizə çatdıraq ki, rayonlar üzrə mərkəzi xəstəxanaların tibbi avadanlıqlarla təminatı yüksək səviyyəyə çatmaq üzrədir. Bu və ya digər hallarla bağlı mərkəzi xəstəxanalarda xidmətin göstərilə bilmədiyi təqdirdə ərazi üzrə digər rayonda yerləşən müəssisəyə müraciət edilərək müvafiq tibbi yardım göstərilə bilər”, – deyə həkim Əliyar Sərvərov əlavə edib.
Mövcud vəziyyət paytaxt klinikalarına əlavə yük yaradır ki, bu da öz növbəsində həkimlərə qəbulun gözləmə vaxtının artmasına səbəb olur.
