Niyə ölkədə soyuq silahlar sosial şəbəkələrdə açıq şəkildə satışa çıxarılır? Bu haqda bu gün, 15 aprel tarixində Bakuplus.az Baku TV-yə istinadən xəbər verir.
Satışa çıxarılan soyuq silahlar arasında daha çox üzük formasında beşbarmaqlar, bank kartı formasında bıçaq, qolbaq və digər forma və ölçüyə malik bıçaqlara rast gəlinir. Qiymətlər isə ölçü və dizayna görə 40-120 manat arası dəyişir.
Məsələ ilə bağlı Azad İstehlakçılar Birliyinin sədri Eyyub Hüseynov qeyd edib ki, azad bazar olduğuna görə müqavilə bağlayıb ölkə ərazisində soyuq silah satmaq olar.
Soyuq silahların satışına görə hər hansı cəza varmı?
Hüquqşünas Emil Aslanov bildirib ki, soyuq silahı əldə etmək, satmaq, həmçinin gəzdirmək, ovçuluq peşəsi istisna olmaqla, qanunla qadağandır.
“Bu əməllər törədildikdə 320 saatdan 400 saatadək ictimai işlər, iki ilədək müddətə islah işləri, bir ilədək müddətə azadlığın məhdudlaşdırılması və ya bir ilədək müddətə azadlıqdan məhrumetmə cəzaları nəzərdə tutulur”, – deyə hüquqşünas qeyd edib.
