Bakıda ilk dəfə Milli Xalça Festivalı keçiriləcək. Bu haqda bu gün, 29 aprel tarixində Bakuplus.az “Azərxalça”ya istinadən xəbər verir.
2 gün davam edəcək festivalda xalçaçılıq sənətinə həsr edilən bir sıra tədbirlərin keçirilməsi nəzərdə tutulur. Bura qədim, müasir, eləcə də müəllif xalçalarından ibarət eksklüziv sərgilərin nümayişi, xalçatoxuma sənəti ilə bağlı böyüklər və uşaqlar üçün ustad dərsləri, maarifləndirici seminarlar, interaktiv teatr tamaşası, yarmarka, muğam axşamı və konsert proqramı daxildir.
Bundan əlavə, Milli Xalça Festivalı günlərində İçərişəhərin küçələri xalçalar və xalça ornamentli xüsusi dekorasiyalarla bəzədiləcək.
Qonaqlar xalçanın ərsəyə gəlməsinin bütün mərhələləri: ipliyin boyanması, çeşnilərin və naxışların vurulması, xalçanın toxunması, emalı, yandırılması, yuyulması prosesləri ilə yaxından tanış ola biləcəklər. “Azərxalça”nın ölkənin 14 regionundan gəlmiş toxucu və emal komandası qonaqlara xalça dəzgahı üzərində dərslər təqdim edəcək.
Həmçinin Mədəniyyət Nazirliyi və Elm və Təhsil Nazirliyi Milli Xalça Festivalında öz stendləri ilə təmsil olunacaq.
Tədbir 4-5 may tarixlərində İçərişəhərdə baş tutacaq. Giriş sərbəstdir.
