“Azərbaycan Hava Yolları” (AZAL) aviaşirkətinin J2-8717 nömrəli Bakı-Mineralnıye Vodı reysini yerinə yetirən təyyarəsinin kapitanı havaya qalxandan və Mahaçqala üzərində hava məkanının bağlı olması barədə NOTAM (uçuş məlumatı) bildirişi alandan dərhal sonra Bakı hava məkanından çıxmadan geri qayıdıb”.
Bu barədə Bakuplus.az-a "Azərbaycan Hava Yolları" QSC-nin Mətbuat xidmətinin məlumat verilib.
Bildirilib ki, təyyarə yerli vaxtla saat 10:13-də Heydər Əliyev Beynəlxalq Aeroportuna uğurla eniş edib.
Rusiya istiqamətində uçuşlarla bağlı yaxın zamanda ümumi məlumat açıqlanacaq.
***
12:30
Səhər saatlarında Bakıdan Mineralnıye Vodı istiqamətində uçan AZAL təyyarəsi dron hücumları səbəbindən geri dönüb.
Bakuplus.az xəbər verir ki, bu barədə məlumatı jurnalist Şakir Eminbəyli yayıb.
O, paylaşımında bildirib:
“Sonuncu faciə niyə dərs olmur? Şimali Qafqaza uçuşlara AZAL-da kim göstəriş verir?”
Məsələ ilə bağlı AZAL-a müraciət ünvanladıq. Ətraflı məlumatın veriləcəyi bildirilib.
Görüntüləri isə "Flightradar24" paylaşıb.
