Bir qrup sərnişinlər 171 saylı marşrut avtobuslarından şikayətlənir. Bu haqda bu gün, 9 fevral tarixində Bakuplus.az Qafqazinfo.az-a istinadən xəbər verir.
Onların iddialarına görə, sürücülər saat 21:15-dən sonra avtobusu son dayanacağa qədər idarə etmirlər. Yarı yoldan qayıdırlar, nəticədə sərnişinlər yolda qalırlar, axşam olduğu üçün isə taksi tapmaq da çətinləşir:
“Zuğulba yolunda sürücülər sərnişinləri avtobusdan düşürür və qarşıdan dönüb təkrar şəhər istiqamətinə gedirlər. Onlar bunu sərnişin azlığı ilə əlaqələndirirlər. Deyirlər ki, 10 nəfər sərnişin olsa, gedərlər, 1-2 nəfərə görə sonuncu dayanacağa qədər avtobus sürmək sərf etmir. Hər gün taksi ilə evə qayıtmaq məcburiyyətində qalırıq”.
Bakıətrafı digər qəsəbə və kəndlərə gedən avtobuslarda da analoji hallar tez-tez yaşanır.
Azərbaycan Yerüstü Nəqliyyat Agentliyindən (AYNA) məsələ ilə bağlı açıqlama verilib. Bildirilib ki, həmin marşrutda sözügedən faktların olduğu aşkarlanıb və qanunamüvafiq tədbirlər görülüb:
“Əraziyə baxış keçirilib və 171 nömrəli avtobuslarda bəzi sürücülərin hərəkət sxemindən yayınaraq son dayanacaq məntəqəsinə getmədikləri məlum olub.
Faktla bağlı intizam tənbeh tədbirləri görülüb. 171 nömrəli marşrutun istismarçısına xəbərdarlıq edilib və nəzarətin artırılması, başlanğıc və son dayanacaq məntəqələri arasında əlaqəliliyin təmin edilməsi tapşırılıb”.
