Paytaxtın Sabunçu rayonu, Sabunçu qəsəbəsi, Məmmədəli, 32 ünvanında yerləşən 115 illik yaşayış binası qəzalı vəziyyətdədir. Bu haqda bu gün, 15 noyabr tarixində Bakuplus.az Real TV-yə istinadən xəbər verir.
1907-ci ildə inşa edilən binada hazırda 23 ailə yaşayır. Tikilinin tavan və döşəmələri hər an uça bilər, tikilini saxlayan dirəklər isə taxtadan olduğundan çürüyüblər. Binanın damı da bərbad vəziyyətdədir, yağış yağan kimi içəri su sızır.
“Külək olanda evdə oturmaqdan qorxuruq, hər yerə yamaq vururuq ki, ev ayaq üstə qalsın. Təmir etmək olmur”, - deyə sakinlərdən biri qeyd edib.
Bina 148 saylı Mənzil Kommunal İstismar Sahəsinin balansındadır. Sözügedən MKİS-in rəisi məsələ ilə bağlı bildirib ki, FHN tikilinin qəzalı olması barədə rəy bildirib və bununla bağlı müvafiq qurumlara artıq müraciət edilib. Həmin qurumlar qərar verdikdən sonra lazımi tədbir görüləcək.
[caption id="attachment_79161" align="alignnone" width="640"]
Foto Real Tv-nin rəsmi Youtube kanalı[/caption]
