Bakının Qaradağ rayonu, Sahil qəsəbəsində mərkəzə gedən yolun bağlanması sakinlərin narazılığına səbəb olub. Bu haqda bu gün, 21 fevral tarixində Bakuplus.az Real TV-yə istinadən xəbər verir.
Bildirilir ki, hasar “Kral” şadlıq sarayının sahibləri tərəfindən inşa olunub. Bundan qabaq qəsəbə mərkəzinə getmək üçün vətəndaşlar 100 metr yol qət edirdilərsə, indi bu məsafə 5 kilometrdən çox olub.
“Yolun bağlanmasından sonra məktəblilər evlərindən məktəbə heç 1 saata çatmırlar. Şadlıq sarayın meneceri isə bizə deyir: “Kimə şikayət edirsiniz, edin”, – deyə sakinlər şikayət edirlər.
Sarayın meneceri isə bildirib ki, o, işini qanun çərçivəsində görüb. Bələdiyyə isə torpaq sahəsi özəl olduğundan bir şey edə bilməyəcəyini qeyd edib.
Sakinlər digər qurumlara müraciət edəndən sonra “Kral” şadlıq evinin nümayəndələri yolu açıblar. Lakin bir müddətdən sonra yol başqa sahibkarlar tərəfindən bağlanıb.
Bu dəfə Əmlak Məsələləri Dövlət Xidmətinə müraciət olunub. Bildirilib ki, adıçəkilən yol 2018-ci ildə keçirilmiş hərracda torpaq sahəsi kimi özəlləşdirilib. Sakinlər üçün isə alternativ yol mövcuddur.
