Paytaxt sakinləri 158 saylı avtobus marşrutunda yaranan sərnişin sıxlığından narazıdır. Gündəlik istifadəçilər bildirirlər ki, pik saatlarda avtobuslara minmək mümkünsüzdür, nəqliyyat vasitələrinin sayı və növü tələbatı ödəmir.
Sakinlər milli.az-a açıqlamasında qeyd edirlər ki, avtobus "Qazel" markalı daha kiçik həcmli avtomobillə əvəz edilib.
Əhali bu avtobusun daha böyük versiyasını gözləyərkən qarşılaşdıqları mənzərə onları təəccübləndirib.
Məsələ ilə bağlı AYNA-dan Milli.Az-ın sorğusuna cavab olaraq bildirildi ki, xidmət keyfiyyətinin yüksəldilməsi məqsədilə 158 nömrəli marşrut xətti üzrə müsabiqə keçirilib və mayın 1-dən yeni daşıyıcı müasir və komfortlu avtobuslarla sərnişinlərə xidmət göstərir.
Xocəsən qəsəbəsini "Memar Əcəmi" metrostansiyası ilə əlaqələndirən marşrut xətti üzrə gündəlik 8 avtobus 10 dəqiqə intervalla fəaliyyət göstərir.
AYNA tərəfindən təhlillər aparılacaq və sərnişin tələbatı yaranacağı təqdirdə, daşıyıcıya xəttə əlavə avtobusların cəlb edilməsi tapşırılacaq.
