Bakı Slavyan Universitetinin (BSU) əlavə və qiyabi təhsil kafedrasının sabiq müdiri Dürdanə Əliyevanın cinayət işi üzrə məhkəmə istintaqı davam etdirilir. Bu gün, 20 fevral tarixində məhkəməyə çağırılan Bakı Slavyan Universitetinin eks-rektoru Nurlana Əliyevanın ölkədə olmadığı açıqlanıb. Bu haqda APA məlumat verib.
Məlum olub ki, Nurlana Əliyeva onun məhkəməyə məcburi gətirilməsi ilə bağlı vəsatət müzakirə olunan vaxt ölkədən çıxıb.
Hakim Əli Məmmədov bildirib ki, Nurlana Əliyevanın ölkəyə daxil olmaması barədə aidiyyəti orqanlar vasitəsilə ona məlumat daxil olub. Onun hazırda Türkiyənin Ankara şəhərində olduğu bildirilir.
Məhkəmə Nurlana Əliyeva ilə bağlı yanvarın 18-də keçirilən iclasda çıxarılmış qərarı qüvvədə saxlayıb. O, ölkəyə daxil olan kimi polis tərəfindən məhkəmə qarşısına çıxarılacaq.
İşin materiallarında qeyd olunur ki, Nurlana Əliyeva Dürdanə Əliyevaya qarşı Baş Prokurorluqla yanaşı, Elm və Təhsil Nazirliyinə də şikayətlər verib. Şikayətdə Dürdanə Əliyevanın öz vəzifə maraqlarından istifadə edərək tələbələrdən aldığı pulları mənimsədiyi göstərilib.
Bundan əlavə, Nurlana Əliyeva Dürdanə Əliyevanı onu ovsunlamaqda ittiham edib. Keçmiş rektor cadugərliyin təsirindən xəstələndiyini bildirib.
Proses martın 6-da davam edəcək.
Nurlana Əliyeva 2016-2021-ci illərdə BSU-nun rektoru olub.
