Bakının Suraxanı rayonundakı 285 saylı məktəbdə 35 il iş təcrübəsi olan müəllimənin işdən qovulduğu iddia olunur. Bu haqda bu gün, 26 aprel tarixində Bakuplus.az Space News-a istinadən xəbər verir.
Müəllimə Təranə Yusifovanın sözlərinə görə, o, 20 il adıçəkilən məktəbdə işləyirdi. Lakin məktəbə gələn yeni direktor Nuranə Yəhyayeva öncə başqa müəllimi daha sonra isə T.Yusifovanı işdən çıxarıb.
Şikayətçi iddia edir ki, o, işdən azad olunmazdan öncə direktor tərəfindən təzyiqə məruz qalıb.
“Təzyiq etdi, mən dinmədim. Otağım ola-ola dedi: “Get başqa sinifdə dərs keç”. Çıxara bildiklərini çıxardı, bilmədikləri də kənardan gəlib dərs keçirlər”, – deyə T.Yusifova əlavə edib.
Hazırda T.Yusifova işsiz qalıb. Elm və Təhsil Nazirliyi, Bakı şəhər Təhsil İdarəsi və digər aidiyyəti qurumlara işlə təmin olunması ilə bağlı müraciət etsə də, problem öz həllini tapmayıb.
Bakı şəhər Təhsil İdarəsindən bildirildi ki, Təranə Yusifova 2017-ci ildən işdən azad olunduğu günə kimi həmin məktəbdə günü uzadılmış qrup rəhbəri kimi çalışıb. Sonradan qruplarda şagird sayının azlığı nəzərə alınaraq, Təranə Yusifova ilə bağlanmış əmək müqaviləsinə xitam verilib.
“2015-ci ildə mənim əmrim səhv yazılıb. Mənə “müvəqqəti” yazmalı idilər, amma əmrimdə yazıblar ki, “daimi qrup rəhbəri olsun”, – deyə şikayətçi buna cavab verib.
BŞTİ isə öz növbəsində qeyd edib ki, Təranə Yusifova digər məktəblərdə qrup rəhbəri kimi işləmək təklifini də qəbul etməyib.
Hazırda məsələ ilə bağlı iş məhkəmə qaydasında araşdırılır.
