Paytaxtın Xətai rayonu, Nazim Şükürov küçəsi, 3B ünvanında yerləşən fərdi evin içərisindən 4 gündür ki, neft qoxulu su axıdılır. Bu haqda bu gün, 15 iyul tarixində Bakuplus.az Xəzər Xəbər-ə istinadən məlumat verir.
Sızıntı 20 il əvvəl tikilmiş evin altında əmələ gəlib, daha sonra su evin içərisinə də dolub. Nəticədə ətrafı neft və mazut iyi bürüyüb. Sakinlər aidiyyəti orqanlara müraciət etsələr də, problem neçə gündür ki, həll olunmur.
Yaxınlıqda yaşayan qonşular da məsələdən narahatdırlar. Onlar da qoxulu suyun evlərinin altına dolduğunu iddia edirlər.
Xətai Rayon Sukanal İdarəsinin ustası Rəfael Şirinov bildirib ki, ərazidə su borusu partlayıb. Lakin xətt tikililərin altında olduğuna görə əraziyə texnika cəlb oluna bilmir. Evlərə görə isə xəttə əlavə yük düşür, bu da vəziyyəti daha da çətinləşdirir. Qurumlar qəzanı aradan qaldırmağa çalışır.
