Bakıda yarım tikili binanın sakinləri narahatdırlar. Bu haqda Real Tv reportaj hazırlayıb.
Paytaxtın Xətai rayonu, Məhəmməd Hadi 152 ünvanında yerləşən yarım tikili binanın sakinləri vəziyyətlərindən şikayətləniblər.
Bina ümumilikdə 7 blokdan ibarətdir. Hər blokda 9 mərtəbənin tikilməsi planlaşdırılsa da, bu cəmi 4 blokda həyata keçirilib. Qalan bloklardan 1-i 8 mərtəbə, digər 2-si isə bir və iki mərtəbəlidir.
Təxminən 1980-ci ildə inşa olunan binanın yarımçıq qalan hissəsində 10 ailə yaşayır. Azərtunel Metro Tikinti səhmdar cəmiyyətinin işçiləri üçün nəzərdə tutulan bina elə həmin qurum tərəfindən tikilib.
Binanın yarımçıq qalmış hissəsində dəmir konstruksiyalar sakinlər tərəfindən mislə bərkidilib.
Sakinlər evlərinin çöldən fərqlənmədiyini bildiriblər. Binanın damı olmadığından, yağan yağış suları zirzəmiyə və evlərə dolur. Bu səbəbdən də binanın sakinləri müxtəlif xəstəliklərdən əziyyət çəkdiklərini qeyd ediblər. Burada yaşayanlardan bəziləri imkan taparaq kirayə evlərə köçüblər.
Bakı İcra Hakimiyyəti bu haqda bildirib ki, binanın yarımçıq qalan hissəsini balansına götürməyib.
Bakı Metropoliteni QSC isə məsələ ilə bağlı cavabdeh tərəfin kim olmasını müəyyənləşdirmək üçün dərin araşdırma keçirilməsinin lazım olduğunu, bunun üçün isə yazılı müraciət olunmasının vacibliyini vuğulayıb.
