Bakının Xəzər rayonu, Buzovna kəndinin sakinləri sahilyanı obyektlərin sahiblərini və icarədarlarını, onların çimərliyə keçməsinə mane olan çoxsaylı hasarlardan üçünü sökməyə məcbur ediblər. Bu haqda bu gün, 11 may tarixində Caliber.az məlumat verib.
Bu hasarlar və məftil hörgülər təxminən bir ay əvvəl çəkilib. Sakinlər bu məsələ ilə bağlı narazılıqlarını bildiriblər. Onlar, həmçinin çimərliklərin və burada yerləşən restoranların çirklənməsinə qarşı olduqlarını qeyd ediblər. Etirazların nəticəsi olaraq, sözügedən ərazidə quraşdırılmış hasarlardan üçü sökülüb və yaranmış məhdudiyyət qismən aradan qaldırılıb.
“Torpaqların icarəsi haqqında” qanunun beşinci bəndinə əsasən, Xəzər dənizinin sahil zonası, o cümlədən əhalinin müalicəsi və istirahəti üçün nəzərdə tutulan ərazilər dövlət mülkiyyətindədir.
[URIS id=43946]
