“Azərbaycan qanunvericiliyində yalnız azyaşlı ilə nikaha girmək qadağası var. Yetkinlik yaşında olan kəs kiminlə istəsə evlənə bilər, belə bir qadağa yoxdur".
Bunu Qaynarinfo-ya "Təmiz Dünya" Qadınlara Yardım İctimai Birliyinin sədri Mehriban Zeynalova sosioloq Fatimə Hacıbəylinin "erkən nikahla ailə qurub ayrılan və daha sonra müxtəlif yollarla varlanan xanımlar özlərindən 15-20 yaş cavan oğlanlarla ya ailə qurur, ya da münasibətdə olurlar" fikrini şərh edərkən deyib.
Sədr hesab edir ki, yetkin yaşında insanın ailə qurması onun şəxsi işidir: "Ona heç kəs qadağa qoya bilməz. Qanunda belə bir şey yoxdur. Konkret yaş qoyulmur ki, sən necə yaşlı kişiyə gedə bilərsən, yaxud da qadınla evlənə bilərsən. Qanun yalnız azyaşlı ilə evlənməyə qadağa qoyur. Hətta 100 yaşında kişi istədiyi qadınla evlənə bilər. İnsanlar qanuna əsaslanmalıdır. Azərbaycan qanunvericiliyində yalnız azyaşlı ilə nikaha girmək cinayət məsuliyyəti daşıyır".
Qeyd edək ki, ekspert Fatimə Hacıbəyli yenidən səs-küylü açıqlaması ilə diqqət çəkib. Ekspert varlı və yaşlı qadınları cavan oğlanlara meyl etməkdə günahlandırıb. O, erkən nikahla ailə qurub ayrılan və daha sonra müxtəlif yollarla varlanan xanımların özlərindən 15-20 yaş cavan oğlanlarla münasibətdə olduğunu, evləndiyini deyib.
