Bakı şəhəri Xətai rayonunda yerləşən Abbasabad küçəsinin sakinləri uzun illərdir dərdlərinə çarə tapa bilmirlər.
Bakuplus.az-a müraciət edən şikayətçilər bildiriblər ki, bu böyük küçənin yolları bərbad vəziyyətdədir.
Onların sözlərinə görə, küçəyə taksilər belə gəlmir:
“Maşınlar pis günə qalır. Taksilər sifarişləri qəbul etmirlər. Deyirlər, yollarınız pis gündədir. Bir az yağış yağan kimi küçədə göl əmələ gəlir”.
Sakinlər bildirib ki, dəfələrlə aidiyyəti qurumlara müraciət etsələr də, məsələ ilə bağlı heç bir tədbir görülmür.
“Tək istəyimiz küçənin asfaltlanmasıdır. Dərdimizi kimə deyək, bilmirik. İcra Hakimiyyətinə də, “Azəryolservis”ə də şikayət ünvanlamışıq. Ancaq hamısı boynundan atır, ya da yola verirlər”, - deyə sakinlərdən biri qeyd edib.
Məsələ ilə bağlı Xətai Rayon İcra Hakimiyyətinə sorğu ünvanladıq. Hələlik sorğumuza heç bir cavab verilməyib.
