Bakının Yasamal rayonu, Zərgərpalan küçəsi, 35 ünvanında yerləşən, 1903-cü ildə tikilmiş memarlıq binasının fasadının qanunsuz təmiri dayandırılıb. Bu haqda bu gün, 30 avqust tarixində Oxu.az məlumat verib.
Daha öncə binanın təmiri barədə tanınmış memar Elçin Əliyev öz Facebook səhifəsində paylaşım edib. O bildirib ki, eyvanın eni kəsilib, taxta pəncərələr ucuz plastik çərçivələrlə əvəz olunub və pəncərələrin üstündə və binanın bütün qarmaqları boyunca fasad rənglənib.
Məsələ barədə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəsmisi Nuridə Allahyarova qeyd edib ki, həmin bina cari ilin aprel ayında Nazirlər Kabinetinin 02.08.2001-ci il tarixli 132 №-li Qərarı ilə yerli əhəmiyyətli tarix-memarlıq abidəsi kimi (inv.№-3569) dövlət qeydiyyatına alınıb. Məsələ ilə bağlı yerində baxış keçirilib, qeyri-qanuni işlərin aparılması faktı öz təsdiqini tapıb. Hazırda işlərin aparılması dayandırılıb.
“Bununla əlaqədar icraçı şirkətə xəbərdarlıq edilib ki, rəsmi qaydada görüləcək işlərlə bağlı layihə Dövlət Xidmətinə təqdim olunduqdan və layihə ilə bağlı rəy verildikdən sonra işlərə başlanıla bilər. Hazırda tarixi abidənin ilkin görünüşünə xələl gətirən müdaxilələrlə bağlı araşdırmalar aparılır, nəticə barədə ictimaiyyətə geniş məlumat veriləcək”, - deyə Allahyarova vəd edib.
[URIS id=66980]
