Paytaxtın Sabunçu rayonu, Zabrat qəsəbəsi, Salatın Əsgərova küçəsində yaşayan sakinlər yol infrastrukturundan şikayətçidirlər. Bu haqda bu gün, 22 dekabr tarixində AzTV məlumat yayıb.
Kanalizasiya sisteminin yararsız vəziyyətdə olması səbəbindən yağış yağan kimi yollarda palçıq yaranır, gediş-gəliş çətinləşir.
“Uşaqları məktəbə aparan avtobus da yollarda dağılır”, - deyə sakinlərdən biri bildirib.
Sabunçu rayonu, Zabrat bələdiyyəsindən bildirilib ki, yollarda kanalizasiya xətti qurulana qədər yolun asfaltlanması məqsədəuyğun deyil.
“Belə ki, Zabrat-2 qəsəbəsinin 70-80 faizində kanalizasiya yoxdur”, - qurum əlavə edib.
Azərsu ASC-dən qeyd olunan ərazidə işlərin icrası baş plana uyğun mərhələli şəkildə ediləcəyi deyilir.
Azəravtoyolun ictimaiyyətlə əlaqələr şöbəsinin rəisi Anar Nəcəfli isə bildirib ki, 2025-ci ili əhatə edən tədbir planı çərçivəsində qəsəbə daxili təmirə ehtiyacı olan küçə və yollarda təmir işlərinin icra olunub yekunlaşdırılması nəzərdə tutulur.
