Masazır qəsəbəsinin Əliağa Vahid küçəsində zibil qabları piyada səkisinə qoyulub. Nəticədə piyadaların gediş-gəlişi üçün maneə yaranır.
Bu barədə Bakuplus.az-a sakinlər məlumat verib.
Sakinlərin sözlərinə görə, artıq 5-6 aydır ki, zibil qabları səkinin ortasına qoyulub:
“Əvvəllər qıraqda idi. Daha sonra gətirib piyada səkilərinə qoydular. Buna görə də səkidən keçmək olmur. Uşaq və əlil arabası ilə keçmək ümumiyyətlə mümkün deyil. Buradan keçmək üçün avtomobil zolağı ilə hərəkət etməliyik. Bu da təhlükəlidir”.
Bildirilib ki, sözügedən ərazidə uzun müddətdir bina tikilir. Buna görə də inşaat sahəsinin qarşısı hasarlanıb. Nəticədə yol zəbt olunub və zibil qablarını yerləşdirmək üçün yer yoxdur.
“3-4 ildir ki, bina tikirlər. Binanın qarşısındakı hasarı açsalar yol genişlənər. Zibil qablarını da arxaya çəkmək olar. Ya da başqa bir əraziyə yerləşdirmək lazımdır”, – deyə sakinlər bildirib.
Məsələ ilə bağlı məlumat verən paytaxt sakinləri ümid edirlər ki, müvafiq qurumlar lazım olan addımları atacaqlar.
Sözügedən ərazidən görüntüləri təqdim edirik:
