2016-cı il aprelin 1-dən 2-nə keçən gecə Azərbaycanın ön xətt mövqeləri və yaşayış məntəqələri Ermənistan silahlı qüvvələri tərəfindən intensiv artilleriya atəşinə məruz qalmışdır. Azərbaycan Silahlı Qüvvələrinin bölmələri əks-hücumla bu təxribatların qarşısını alıb. Dörd gün davam edən Aprel döyüşlərində Azərbaycanın 90-dan çox hərbi qulluqçusu şəhid olub, 40-dan artıq döyüşçüsü yaralanıb.
Aprel döyüşləri zamanı Azərbaycan Silahlı Qüvvələri tərəfindən Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və Cocuq Mərcanlı kəndi, Goranboy rayonunun Gülüstan kəndi və Tərtər rayonunun Suqovuşan kəndi istiqamətində bəzi mövqelər düşməndən azad olundu. Aprelin 5-də saat 12:00-dan etibarən Azərbaycan-Ermənistan qoşunlarının təmas xəttində tərəflərin razılığı ilə əməliyyatlar dayandırıldı.
Azərbaycan Respublikasının Müdafiə Nazirliyinin verdiyi məlumata əsasən, bu döyüşlərdə 320-dən artıq düşmən məhv edildi və 500-dən artıq erməni hərbi qulluqçusu yaralandı. Qarşı tərəfin 30-dək tankı və digər zirehli texnikası, 25-dən artıq artilleriya qurğusu sıradan çıxarıldı, Madagiz yaşayış məntəqəsində yerləşən qərargahı və əsas hərbi hissələri məhv edildi.
