XX əsrin əvvəllərində nəqliyyatın bir çox sahələri, o cümlədən aviasiya inkişaf etmişdi. 1910-cu ildə Bakı Qafqazda ilk Beynəlxalq Aviasiya həftəsinin baş tutacağı yer kimi seçilmişdi. Nümayiş etdiriləcək uçuşlar oktyabrın sonlarına Balaxanı yolunun yaxınlığındakı (hazırda Hava Limanına gedən əsas yol) tarlada planlaşdırılırdı. Aviasiya tamaşasında iştirak etmək üçün bir neçə pilot, o cümlədən dövrün məşhur pilotlarından olan Sergey Utoçkin və Adam Qaber-Vlınski də dəvət edilmişdilər.
Bakılılar hadisəyə böyük maraq göstərirdilər. Tarlanın kənarındakı tribunada oturacağın qiyməti neftçinin aylıq maaşı olan 30 rubl 60 qəpiyə çatsa da, biletlər əvvəlcədən satılmışdı. Uçuşlar günorta başlamalı idi, lakin tamaşaçılar səhər tezdən yığışmağa başlamışdılar. Burada 20 minə yaxın insan toplaşmışdı. [Первое авиашоу на Кавказе - Бакинская авианеделя (1910) — OurBaku]
Utoçkinin uçuşları 20-23 oktyabrda baş tutur. İlk gündə pilot “Farman” təyyarəsi ilə havaya qalxır, lakin qəfil külək təyyarəni kursdan kənarlaşdırır. Utoçkin təyyarəni nəzarət altında saxlamağa, sahənin üzərində dövrə vurmağa və uğurla enməyə nail olur. Sonrakı günlərdə Bakıda güclü küləklərin olmasına baxmayaraq, pilot uçuşları ləğv etmir. Günlərin birində təyyarə hündürlüyə qalxır. Bu zaman mühərrik küt səs çıxarır və təyyarə enməyə başlayır. Göydən düşən təyyarəni görən tamaşaçılar dəhşətə gəlir, lakin bir neçə dəqiqə ərzində Utoçkin təyyarəni nəzarətə alır və uçuşlara davam edir. Enəndən sonra pilot bakılılar tərəfindən qəhrəman kimi qarşılanır. [Рудольф Гиль. Приветъ изъ Баку (Архивные документы сквозь столетия). Баку-2014]
Bakıda keçirilən Beynəlxalq Aviasiya həftəsi o dövrün digər məşhur pilotu Adam Qaber-Vlınski ilə davam edir. O, cəsarətli pilot, Paris, Odessa və Rostov Aviasiya Klubunun diplomlarının sahibi kimi tanınırdı.
Aviasiya həftəsində Mixail Yefimov və Aleksandr Vasilyev kimi digər məşhur pilotlar da iştirak edirdilər. Yekun olaraq, pilotlar arasında müsabiqə elan edilmişdi və onun nəticəsinə görə 1-ci yerə M.Yefimov, 2-ci yerə A.Vasilyev, 3-cü yerə isə A.Qaber-Vlınski layiq görülmüşdü. [https://azerhistory.com/?p=13192]
