Rotşildlərin kontoru Bakıda, N.Rəfibəyli küçəsi, 7-də yerləşib. Bina 1899-cu ildə polyak memar Kazimir Skureviç tərəfindən inşa edilib.
6 may 1883-cü il tarixində Bakıda neft hasilatı və ticarəti ilə məşğul olan Rotşild baronları Bakı şəhərində “Xəzər-Qara dəniz neft sənayesi və ticarəti cəmiyyəti”ni qeydiyyatdan keçirmişlər. Bakı şəhərində Rotşildlərin işləri yaxşı getdiyi üçün Cəmiyyətlərinin mərkəzi kontorunun tikintisi zərurəti yaranmışdır. Tikinti üçün Nizami (keçmiş Qubernskaya) küçəsi ilə Murtuza Muxtarov (keçmiş Persidskaya) küçələrinin kəsişməsi seçilir. [https://genprosecutor.gov.az/az/page/prokurorluq/azerbaycan-respublikasi-bas-prokurorlugunun-binasi]
1898-1899-cu illər ərzində neoqotik üslubda inşa olunmuş bina hazır olur. Zirzəmilərlə böyük üçmərtəbəli bina Aleksandr-Nevski Rus Pravoslav Kilsəsinin qarşısında inşa edilmişdir. Binanın tikintisində memar açıq rəngli aqlay üzləmə daşlarından istifadə edir və bu, binaya qeyri-adi görünüş verir. Birinci mərtəbədəki əsas giriş nəhəng sütunlarla bəzədilir. [Fətullayev-Fiqarov Ş. Bakı memarları XIX əsrin sonu-XX əsrin əvvəlində. Bakı-2013]
1912-ci ildə Rotşildlər Rusiya İmperiyasındakı bütün müəssisələrini Britaniya-Hollandiya konserni Royal Dutch Shell-ə verdilər və bu səbəbdən sonradan binada Hollandiyanın konsulluğu yerləşdirildi.
Sovet dövründə binada “Mərkəzi Kəndli Evi” yerləşirdi. Binanın fasadının bəzi detalları və dekorasiyası dağıdılmışdır. Məsələn, binanın küncündəki qüllə, əsas girişin üstündə yerləşən balkonun dekorasiyaları və s. Sonralar isə binada Azərbaycan SSR Ali Məhkəməsi yerləşmişdir. [https://azerhistory.com/?p=5160]
Hazırda binada Azərbaycan Respublikası Baş Prokurorluğu yerləşir. Tikili dövlət əhəmiyyətli memarlıq abidəsi hesab edilir.
[URIS id=108849]
