“Gənclik” sanatoriyası bir vaxtlar Bakının Zuğulba kəndində yerləşib. Bu istirahət məkanı 1964-cü ildən beynəlxalq gənclər düşərgəsi kimi fəaliyyət göstərməyə başlayıb. [Котлиаров Е.А. География отдыха и туризма: формирование и развитие территориальных рекреационных комплексов. Москва-1978]
Sonralar bura bakılıların məşhur yay istirahət yerinə çevrilib, 1970-ci illərdə isə SSRİ-nin müxtəlif bölgələrindən gələn turistlər arasında məşhurluq qazanıb.
“Gənclik” ilboyu işləyirdi. Yay mövsümlərində burada boş yer tapmaq çətin olurdu. Sanatoriyanın ərazisində yay kottecləri və mərkəzi korpus, “Oazis” mehmanxanası var idi. Həmçinin burada yeməkxana, kinoteatr, bilyard zalı, hovuzlar yerləşirdi, dəniz sahilinə aparan kanat yolu var idi. [https://media.az/society/1067841974/prizrak-zabroshennogo-sanatoriya-gyandzhlik-reportazh/]
Sanatoriyada vaxtilə istirahət edən bir insanın sözlərindən: “...meydançada “Xolodok” kafesi var idi. Orada nəhəng şahmat stolları yerləşirdi və hər fiqurun ölçüsü 30-40 santimetr idi.”
“Gənclikdə” müxtəlif elmi konfranslar təşkil olunurdu. Burada məşhur aktyorlar, müğənnilər qastrol səfərləri zamanı dincələrdilər: Müslüm Maqomayev, Vladimir Kalyaqin, Ziya Bünyadov, Anar Məmmədxanov, Maqsud və Rüstəm İbrahimbəyovlar və başqaları. 1980-ci illərdə isə buraya ABŞ-dən, Qərbi Avropadan, Latın Amerikasından, Hindistandan və Afrikadan gələn qonaqlar da istirahət edirdilər.
1990-cı illərdə sanatoriya yararsız hala düşməyə başlayıb. Ermənistanla müharibə vəziyyətində olan Azərbaycanın məcburi köçkünləri sanatoriyanın ərazisində yerləşdirilirdi. 2000-ci ildən sonra “Gənclik” hissə-hissə bağlanmağa başladı. Əvvəl kotteclər fəaliyyətini dayandırdı, sonra kanat yolu, restoranlar, otel, idman kompleksi və s. Hazırda sanatoriyanın ərazisi baxımsız vəziyyətdədir. [https://azerhistory.com/?p=44931]
