Sərdar Sadıx oğlu Səmədov 28 iyun 1927-ci ildə Bakının Suraxanı qəsəbəsində neftçi ailəsində anadan olub.
O, Suraxanıda 85 saylı orta məktəbi bitirərək Bakı Enerji-maşınqayırma texnikumunda təhsilini davam etdirib. 1945-ci ildə həmin texnikumu bitirdikdən sonra L.Şmidt adına maşınqayırma zavodunda texnik-texnoloq kimi əmək fəaliyyətinə başlayıb.
Səmədov 1947-1952-ci illərdə indiki Bakı Dövlət Universitetinin Geologiya-coğrafiya fakültəsində mühəndis-geoloq ixtisası üzrə təhsil alıb. Təhsil alarkən “Paleontologiya və tarixi geologiya” kafedrasında öz ixtisası üzrə laborant kimi çalışıb, 1952-ci ildə aspiranturaya qəbul olunub, daha sonra assistent, dosent və professor vəzifələrinə yüksəlib. [http://geology.bsu.edu.az/az/news/unudulmaz_alim_v_pedaqoq]
Səmədov elmi-pedaqoji fəaliyyətə 1951-1952-ci illərdən başlayıb. 1956-cı ildə o, geologiya-mineralogiya elmləri namizədi elmi dərəcəsini, 1969-cu ildə isə doktorluq elmi dərəcəsini alıb. Onun 1956-1957-ci illərdən çap olunan məqalələri Azərbaycanın əsas neftli-qazlı vilayətləri, tektonik qırılmaları, onların tipləri və digər məsələlərə həsr olunub. Doktorluq dissertasiyasında Səmədov tərəfindən Xəzərin qərb sahilboyu zonasının (Dağıstan, Azərbaycan) neft-qaz-geoloji rayonlaşdırılması sxemi təklif olunmuş, yura çöküntüləri üzrə ilk dəfə olaraq, struktur xəritəsi tərtib edilmişdir.
Alim 154-dən çox elmi əsərin, o cümlədən 11 monoqrafiya, dərs vəsaiti və tədris proqramlarının, 120-dən çox məqalə və istehsalat hesabatlarının, elmi-kütləvi kitabların müəllifi olub. O, 20-dən çox beynəlxalq və respublika miqyaslı konqres və konfransların iştirakçısı olaraq, Azərbaycanı təmsil edib.
Səmədov SSRİ Təhsil Nazirliyinin qərarına əsasən, uzun müddət xarici ölkələrdə (Əlcəzair, Əfqanıstan) elmi-pedaqoji fəaliyyət göstərmişdir, 1971-1974-cü illərdə Əlcəzairdə Neft-qaz İnstitutunda kafedra müdiri və professor vəzifəsində çalışmış və geoloji fənləri fransız dilində tədris etmişdir. O, 1977-1979-cu illərdə Əfqanıstanda Kabil Politexnik İnstitutunda neft və qaz kafedrasının müdiri və professoru vəzifələrində çalışmışdır. [Şərəfli ömür yolu.//Elm. 24 avqust 2007]
Alim 1985-1992-ci illərdə BDU-nun “Ümumi geologiya və hidrogeologiya” kafedrasının müdiri, 2003-2011-ci illərdə “Ümumi geologiya” kafedrasının müdiri vəzifələrində çalışmışdır.
O, “Əməkdar müəllim” adına və bir sıra fəxri fərmanlara layiq görülmüşdür.
Sərdar Səmədov 5 iyul 2012-ci ildə Bakıda vəfat edib. [http://static.bsu.az/w8/Xeberler%20Jurnali/Tebiet%20%202012%202/215-216.pdf]
